हेटौंडाको पाँच महिनामा साढे ६० करोड मात्रै खर्च
हेटौंडा– हेटौंडा उपमहानगरपालिकाले चालु आर्थिक वर्ष २०७८–०७९ को पाँच महिनामा साढे ६० करोड अर्थात २१ प्रतिशतमात्रै बजेट खर्च गर्न सकेको छ ।
हेटौँडा उपमहानगरले चालु आर्थिक वर्षमा ६० करोड ५४ लाख बजेट खर्च गरेको उपप्रमुख मिनाकुमारी लामाले जानकारी दिएकी छन् । बिहीबार उपमहानगरपालिकाको दशौं नगरसभामा वित्तीय अवस्था प्रस्तुत गर्दै उपप्रमुख लामाले चालु आर्थिक वर्षको पाँच महिनासम्म खर्च कम देखिनुमा प्राविधिक कारण रहेको बताएकी छन् ।
उपमहानगरपालिकाले आर्थिक वर्ष २०७८–७९ का लागि दुई अर्ब ६० करोड १५ लाख ५२ हजार ९ सय १० रुपैयाँको बजेट ल्याएको थियो । दशौं नगरसभामा बजेट संशोधनको प्र्रस्ताव पेस गरेको छ । लामाका अनुसार संशोधित बजेट २ अर्ब ८५ करोड प्रस्ताव गरिएको हो । नगरसभाबाट पारित नीति तथा कार्यक्रम र संशोधित बजेटले नगरवासीको जीवनस्तरमा गुणात्मक सुधार हुँदै जाने नगर प्रमुख हरिबहादुर महतले बताए ।
उपप्रमुख लामाले अधिकांश क्षेत्रगत आयोजना तथा कार्यक्रम सम्झौता भएर सञ्चालन भइरहेको र खर्च भुक्तानी भइनसकेका कारण बजेट खर्च कम भएको बताइन् ।
‘धेरै आयोजना र कार्यक्रम चलिरहेकै कारण भुक्तानी भइसकेको छैन । त्यसकारण खर्च कम देखिएको हो । क्षेत्रगत खर्चमा कमी देखिए पनि असार मसान्तसम्म बजेट खर्चमा उल्लेखनीय प्रगति हुने अपेक्षा लिएका छौँ,’ लामाले भनिन् ।
उपमहानगरपालिकाले विकासको क्षेत्रमा २० करोड ८२ लाख ५३ हजार, कार्यालय सञ्चालन तथा प्रशासनिक क्षेत्रमा ९ करोड ७७ लाख ५४ हजार, सुशासन तथा अन्तर सम्बन्धित क्षेत्रतर्फ १ करोड २ लाख ८९ हजार, सामाजिक विकासमा २७ करोड ५० लाख ९७ हजार, आर्थिक विकासको क्षेत्रमा १ करोड ४० लाख ४८ हजार खर्च भएको उपप्रमुख लामाले जानकारी दिइन ।
