भुटनदेवी माविको अध्यक्षमा सिग्देल
हेटौंडा/हेटौंडा उपमहानगरपालिका वडा नम्बर–४ स्थित भुटनदेवी माध्यमिक विद्यालय (प्राविधिक शिक्षालय)को व्यवस्थापन समिति अध्यक्षमा ४ नम्वर वडाका अध्यक्ष नवीन सिग्देल चयन भएका छन् । मंगलबार बसेको विद्यालय व्यवस्थापन समितिको बैैठकले सिग्देललाई सर्वसम्मत रुपमा अध्यक्ष चयन गरेको हो ।
२९ पुसमा विद्यालयको अभिभावक भेला सम्पन भए पनि विद्यालय व्यवस्थापन समिति चयन गर्न सकेको थिएन । २ जना खुलातर्फ १४ जना र २ जना महिलातर्फ २० जनाको उम्मेदवारी परेपछि अभिभावकबाट विद्यालय व्यवस्थापन समिति सदस्य चयनमा हुन सकेको थिएन । विद्यालय व्यवस्थापन समिति सदस्यहरुमा गोमा सुनुवार, रिमा श्रेष्ठ, कृष्ण प्रसाद कँडेल, नारायण प्रसाद तिमल्सिना, राजेन्द्र बस्ताकोटि र राधिका चौंलागाई चयन भएका छन् ।
कार्यक्रममा समितिका अध्यक्ष सिग्देलले आफ्नो कार्यकालमा समग्र शिक्षाको गुणस्तरमा कुनै किसिमको सम्झौता नगरी अघि बढ्ने प्रतिबद्धता व्यक्त गरे । ४ नम्बर वडा शैक्षिक अभियानमा लागिपरेको बताउँदै अध्यक्ष सिग्देलले आगामी दिनमा पनि शैक्षिक क्षेत्रमा उल्लेखनीय काम गर्ने बताए । सथै अध्यक्ष सिग्देलले आफ्नो कार्यकालको पहिलो बैठकबाट विद्यालयका पूर्वप्रधानाध्यापक डेण्टी जंग शाहको स्मृतिमा कोष स्थापना गर्ने घोषणा गरेका छन् । भुटनदेवी माध्यमिक विद्यालयमा दुई हजार तीन सय विद्यार्थीहरु अध्यनरत छन् ।
