विद्यार्थीको सहारा बन्दै हेटौंडा–१८ का वडाध्यक्ष अनिल बानियाँ

संवाददाता
२०८० आश्विन १६, मंगलवार १३:५६

हेटौंडा– हेटौंडा उपमहानगरपालिका वडा नम्बर–१८ का वडा अध्यक्ष अनिल बानियाँ वडाभित्र बसोबास गर्ने क्याम्पस पढ्दै गरेका विद्यार्थीका लागि सहारा बनेका छन् ।

आर्थिक अभावकै कारण उच्च शिक्षा अध्ययन गर्न नसक्ने परिवारलाई लक्षित गरी उनले सुरु गरेको निःशुल्क बस सेवा प्रभावकारी बनेको छ । १८ नम्बर वडाका विद्यार्थीलाई उच्च शिक्षा हासिल गर्न हटिया चिसापानी वा हेटौंडा बजार नै आउनुपर्ने बाध्यता छ ।

हेटौंडासम्म आउजाउ गर्दा बिरामीलाई पढ्ने खर्च भन्दा बढी यातायातमा खर्च हुने गरेको छ । यसै विषयलाई मध्यनजर गरेर वडाध्यक्ष बानियाँले आफ्नो वडाबाट टाढाको बाटो क्याम्पस पढ्न जाने विद्यार्थीहरुलाई निःशुल्क बस सेवा सुरु गरेका हुन् ।

१८ नम्बर वडाबाट हेटौंडाको बजार क्षेत्रमा रहेका क्याम्पसमा अध्ययन गर्न आउनका लागि १८ किलोमिटर टाढा पर्छ । बस भाडा तिरेर विद्यार्थीलाई आउन पनि समस्या छ । त्यसैले त्यस वडाबाट क्याम्पस पढ्न आउने विद्यार्थीका लागि निःशुल्क बस सेवा सुरु गरिएको वडा अध्यक्ष बानियाँले जानकारी दिए ।

यस वडाबाट १ सय २९ जना विद्यार्थी हेटौंडा बजार आसपासका क्याम्पसमा अध्ययन गर्न आउने गरेका छन् । ती विद्यार्थीहरुको बस भाडा वडा कार्यालयले तिरिदिन लागेको उनले बताए । गत भदौ १७ गतेदेखि यस क्षेत्रमा निःशुल्क बस सेवा सुरु भएको हो ।

पढ्न चाहने विद्यार्थीका लागि यो नयाँ सुरुवात रहेको उनले बताए । हरेक दिन क्याम्पस आउन जानका लागि बसभाडा महगो पर्ने, कोठा भाडामा लिएर पढ्नका लागि बिद्यार्थीका लागि सहज नहुने भएकाले यसतर्फ सहयोग गरिएको वडा अध्यक्ष बानियाँले बताए ।

यसमा तपाइको मत

Your email address will not be published. Required fields are marked *


*