सुनिल मोक्तान लोकतान्त्रिक तामाङ संघको उपमहासचिव चयन
हेटौंडा– नेपाल कम्युनिष्ट पार्टी (एमाले) निकट लोकतान्त्रिक तामाङ संघ नेपालको केन्द्रीय उपमहासचिवमा मकवानपुरका चर्चित युवा नेता सुनिल मोक्तान चयन भएका छन् ।
संघको काठमाडौंमा शनिवार भएको दोस्रो राष्ट्रिय सम्मेलनले हेटौंडा उपमहानगरपालिका वडा नम्बर १५ का वडा अध्यक्षसमेत रहेका मोक्तानलाई उपमहासचिवमा सर्वसम्मत चयन गरेको हो । मोक्तान एमाले मकवानपुर जिल्ला सचिवालय सदस्य तथा उपमहानगर इञ्चार्ज छन् ।
मकवानपुरमा तामाङ समुदायको पहिचान र समग्र क्षेत्रको विकास मोक्तानले विगतदेखि अहम भूमिका निर्वाह गर्दै आएका थिए । यसैगरी, संघमा मोक्तानसहिद पदाधिकारी र केन्द्रीय सदस्यहरुमा गरेर मकवानपुरका आधा दर्जन नेताहरुको सहभागिता रहेको छ । संघको सचिवमा थाहा नगरकी एमाले नेतृ बरिना बल सर्वसम्मत चयन भएकी छन् ।
संघको केन्द्रीय सदस्यमा हेटौंडा उपमहानगरपालिका १० नम्बर वडाका वडाध्यक्ष फुर्वा दोर्जे लामा, रामबहादुर गोले, चन्द्र योञ्जन, नारायण बल, सुशिला मोक्तान, दिलबहादुर स्याङ्तान चयन भएका छन् । संघको प्रदेश आयोजक कमिटी सदस्यमा रत्न ब्लोन, जितबहादुर घलान र धनबहादुर योञ्जन चुनिए ।
संघको राष्ट्रिय सम्मेलनले अध्यक्षमा पूर्वमन्त्रीसमेत दावा दोर्जे लामालाई चयन गरेको छ । १ सय ५१ सदस्यीय केन्द्रीय कमिटी रहने संघको स्थाना १० भदौ २०६३ सालमा भएको थियो ।
