जिसस मकवानपुरमा गठबन्धनको प्यानल नै विजयी
हेटौंडा– जिल्ला समन्वय समिति जिसस मकवानपुरको प्रमुखमा ललित बहादुर घलान विजयी भएका छन् ।बिहीबार सम्पन्न निर्वाचनमा गठबन्धनको उम्मेदवार नेकपा माओवादी केन्द्रका घलानले १७ मत प्राप्त गर्दै प्यानल सहित विजयी भएका हुन् ।
हेटौंडा उपमहानगर वडा नम्बर १२ वडा अध्यक्षको पदबाट राजिनामा दिएर घलानले जिसस प्रमुखमा उम्मेदवारी दिएका थिए। जिसस प्रमुखकै आकांक्षी नेकपा एमालेबाट बुद्धिराम डिम्डुङले ३ मत पाए ।जिसस उपप्रमुखमा गठबन्धनबाट नेपाली कांग्रेसका सानुकाजी लुइटेल एकल उम्मेदवारी परेपछि निर्विरोध निर्वाचित भएका हुन ।
महिला सदस्यमा गठबन्धनबाट नेपाली कांग्रेसकी तारा ढुंगाना, विष्णुमाया थपलिया, र सुमित्रा थिङले १७ मत प्राप्त गर्दै निर्वाचित भएका हुन् ।नेकपा एमालेबाट बिना कुमारी थिङ लामाले ३ मत प्राप्त गरिन् ।
दलित सदस्यमा नेकपा एकीकृत समाजवादीबाट सुनिता दर्नाल परियारको एकल उम्मेदवारी परेपछि निर्विरोध निर्वाचित भएका छन् ।
खुलातर्फ ३ जना सदस्यमा गठबन्धनको तर्फबाट नेकपा एकीकृत समाजवादीका वीरेन्द्र कुमार लामा १६ नेकपा माओवादी केन्द्रबाट खड्क बहादुर पुलामी १७ र सुवर्ण गोपाली १७ मत सहित विजयी भएका छन् ।
